“Azərbaycan bizə göstərdi ki...” | Ukrayna torpaqlarını necə geri ala bilər?

“Qarabağın qaytarılması, Ukrayna üçün nümunədir. Şuşada olarkən Mariupol və Yaltanı düşünürdüm”.

Ukraynalı tanınmış jurnalist və publisist Dmitri Qordon Azərbaycana səfəri zamanı səsləndirdiyi fikirlərlə diqqət çəkib.

Onun sözlərinə görə, Azərbaycan Qarabağı azad etməklə Ukrayna üçün mühüm bir nümunəyə çevrilib:

“Azərbaycan Ukrayna üçün böyük nümunədir. Azərbaycan bizə göstərdi ki, hər kəs “siz bu torpaqları geri qaytara bilməzsiniz” deyəndə (mən Qarabağı nəzərdə tuturam), hətta dostlar və tərəfdaşlar belə mübarizədən vaz keçməyi tövsiyə edəndə azərbaycanlılar səbirlə, planlı, ağıllı şəkildə hazırlaşdılar və torpaqlarını geri aldılar”.

Dmitri Qordon Şuşada çəkdirdiyi fotolarla bağlı da duyğularını bölüşüb: “Şuşada – Azərbaycanın Qarabağdakı bu gözəl şəhərində şəkil çəkdirəndə düşündüm ki, mütləq Mariupolda, Donetskdə, Luqanskda, Simferopol və Yaltada da şəkil çəkdirəcəyəm. Azərbaycanda olarkən daim öz yurdum haqqında düşünürdüm”.

O, Azərbaycanın Ukrayna üçün bir başqa örnək olduğunu da vurğulayıb: “Azərbaycan korrupsiyaya qarşı qətiyyətli mübarizəsi, həqiqi vətəndaşlıq mövqeyi, ağıllı və balanslaşdırılmış siyasəti ilə nümunədir. Bu gün beynəlxalq arenada Azərbaycanla hesablaşırlar”.

D.Qordon sonda Azərbaycanda olmaqdan məmnunluğunu ifadə edib: “Bu möhtəşəm ölkədə ola bildiyim üçün çox xoşbəxtəm”.