Azərbaycan metallurgiya zavodunun inşasını dayandırmağı tələb edib

Azərbaycan hökuməti Ermənistandan Naxçıvanla həmsərhəd bölgədə iri metallurgiya zavodunun inşasının dayandırılmasını tələb edib.

Nazirlər Kabinetindən bildirilib ki, məktub ekologiya və təbii sərvətlər naziri Muxtar Babayevin adından Ermənistanın ətraf mühit nazirinə ünvanlanıb.

Bildirilib ki, iki ölkə arasındakı şərti sərhəddən bir neçə yüz metr aralıda yerləşən Arazdəyən yaxınlığında həyata keçirilən fəaliyyətlə bağlı “Transsərhəd kontekstində ətraf mühitə təsirin qiymətləndirilməsi haqqında Konvensiya”da nəzərdə tutulan müvafiq prosedura başlanılıb.

Xüsusi vurğulanıb ki, Espo Konvensiyasının 1-ci əlavəsinə əsasən, metallurgiya zavodları açıq şəkildə əhəmiyyətli mənfi transsərhəd təsirə səbəb ola biləcək fəaliyyət kimi tanınır. Sənədin 3.1-ci maddəsinə uyğun olaraq, Ermənistan qeyd olunan fəaliyyətin ətraf mühitə təsiri ilə bağlı Azərbaycanı xəbərdar etməyə borcludur. Lakin bu layihə ilə bağlı heç bir bildiriş olmayıb.

Vurğulanıb ki, Konvensiyanın 3.7-ci maddəsinə uyğun olaraq, Azərbaycan təsirə məruz qalan tərəf kimi ilkin mərhələdə Ermənistandan layihənin mənfi transsərhəd təsiri ilə bağlı məlumat mübadiləsinin aparılmasını tələb edir. Eyni zamanda Azərbaycan hökuməti layihənin transsərhəd təsiri ilə bağlı suallar tam aydınlaşdırılana və adekvat şəkildə baxılana qədər Ermənistandan zavodun tikintisinin dərhal dayandırılmasını tələb edib.

Məsələ ilə bağlı Birləşmiş Millətlər Təşkilatının Avropa İqtisadi Komissiyasının icraçı katibinə də müvafiq bildiriş ünvanlanıb.