Azərbaycan vətəndaş cəmiyyətinin nümayəndələri Vensə açıq məktub ünvanlayıblar - Baku TV

Azərbaycanın 45 vətəndaş cəmiyyətinin nümayəndələri Amerika Birləşmiş Ştatlarının vitse-prezidenti Cey Di Vensə açıq məktub ünvanlayıblar.

Qeyd olunub ki, hazırkı sülhə qədər Azərbaycanın keçdiyi yol dərin itkilərlə yadda qalıb. 1987-ci ildən bəri Ermənistandakı dədə-baba torpaqlarından zorla çıxarılan Qərbi azərbaycanlıların üzləşdiyi tarixi ədalətsizliyi xatırlamalıyıq.

Yüzlərlə kənd viran qoyulub, evlər talanıb, İrəvandakı tarixi Göy Məscid də daxil olmaqla müqəddəs yerlər təhqir edilib və ya tarixi izləri silinib.

Onilliklər ərzində Azərbaycan cəmiyyətinə inteqrasiya olmasına baxmayaraq, əcdadlarımızın məzarlarını ziyarət etmək və dağıdılmış evləri bərpa etmək arzusu xalqımızda dinc və humanitar bir ürək döyüntüsü olaraq qalır.

“Qərbi azərbaycanlılar heç bir ərazi iddiası irəli sürmürlər. Onların məqsədi Ermənistanın suverenliyini təhdid etmək deyil, sülh və ləyaqət şəraitində öz yurd yerlərinə qayıtmaq kimi fundamental insan hüququnu həyata keçirməkdir.

Biz 1990-cı illərin əvvəllərində Ermənistandan qovulan azərbaycanlıların qayıtmaq hüququnun müdafiəsi və mədəni irsinin qorunması üçün sizdən dəstək istəyirik. Qərbi azərbaycanlıların tarixi yurdlarına dinc yolla qayıtmalarına və Ermənistanda Azərbaycan xalqına məxsus dağıdılan dini və mədəni irs yerlərinin bərpasına dəstəyiniz düzgün istiqamətdə atılmış mühüm bir addım ola bilər.

Bundan əlavə, biz inanırıq ki, əcdadlarının Ermənistandakı torpaqlarından zorla qovulan azərbaycanlıların geri qayıtmaq hüququ məsələsi real və hərtərəfli sülh yolu ilə həll olunmalıdır. Qərbi Azərbaycan İcması dinc qayıdışla bağlı konstruktiv dialoq çağırışı etsə də, bu çağırışlar cavabsız qalıb”, – deyə məktubda qeyd olunur.