Azərbaycana dəymiş ziyanın hesablanması istiqamətində fəaliyyət davam etdirilir

“Qərbi Azərbaycan Xronikası” layihəsi çərçivəsində növbəti veriliş efirə gedib.

Verilişin budəfəki qonağı Milli Məclisin Beynəlxalq əlaqələr komitəsinin üzvü, siyasi elmlər doktoru Rizvan Nəbiyev olub.

O, anadan olduğu Basarkeçər rayonunun Qanlı kəndindən söhbət açıb. Deyib ki, ailəsi ilə birlikdə 1988-ci il dekabrın 3-də zorla ata-baba yurdundan qovulub, didərginlik həyatı yaşamağa məhkum olub.

Diplomatik fəaliyyətlə məşğul olduğunu xatırladan müsahib bildirib ki, əldə etdiyi bütün uğurlarda Qanlı kənd orta məktəbində aldığı ilk təhsilin mühüm rolu olub. O, diplomatik fəaliyyətlə məşğul olduğu illərdə Ermənistanın Azərbaycana qarşı ərazi iddiaları və Qarabağın tarixinə dair alman, ingilis dillərində 15 kitabın həmmüəllifi olduğunu söyləyib.

Qeyd edib ki, Qərbi Azərbaycan həqiqətlərinin də bu qaydada beynəlxalq ictimaiyyətə çatdırılması üçün elmi və diplomatik müstəvidə fəaliyyət ortaya qoyub.

Deputat bildirib ki, Ermənistan soydaşlarımızın deportasiyası, torpaqlarımızın işğalı ilə yanaşı, Azərbaycana, dinc sakinlərimizə qarşı genişmiqyaslı mina terroru törədib. Onun sözlərinə görə, 1991-ci ildən indiyə qədər 3 500-ə yaxın azərbaycanlı mina terrorunun qurbanı olub.

Millət vəkili R.Nəbiyev Ermənistanın konstitusiyasında, həmçinin digər hüquqi və siyasi aktlarında Azərbaycana qarşı ərazi iddialarının yer almasına da toxunub. Deyib ki, Ermənistan Konstitusiyasında dəyişiklik olmadan sülh müqaviləsi imzalana bilməz.