Azərbaycandan növbəti humanist addım

“Ermənistan Baş nazirinin də etiraf etdiyi kimi, mülki şəxslərə zərər dəyməyib. Bununla əlaqədar Avropa İttifaqı, Fransa və Almaniya rəsmilərinin yoxlanılmamış və qeyri-ciddi bəyanatları anlaşılmaz olaraq qalır”.

Bu fikirləri Prezidentin köməkçisi Hikmət Hacıyev Beynəlxalq Qızıl Xaç Komitəsinin Bakı ofisi, həmçinin digər beynəlxalq tərəfdaşlarla görüşündən sonra sosial şəbəkə hesabında yazıb.

O bildirib ki, dərman, ərzaq və digər malların BQXK tərəfindən Laçın-Xankəndi və Ağdam-Xankəndi yolları vasitəsilə çatdırılması üçün bütün lazımi şərait yaradılıb və təmin ediləcək.

Hikmət Hacıyev həmçinin əlavə edib ki, Azərbaycan tərəfi BQXK vasitəsilə erməniəsilli yaralı hərbçilərə tibbi yardım göstərməyə və ya onlara kömək etməyə hazırdır. Müraciət nəticəsində yaralı hərbçilərin toplanması üçün BQXK-nın tibbi maşınlarının hərəkətinə dəstək verilir.

“Bu məqsədlə biz də təcili tibbi yardım maşınları ayırmağa, tibbi yardım göstərməyə hazırıq. Ermənistana tibbi təxliyə üçün tibbi maşınlar Ermənistandan da gələ bilər. Meydanda qalan döyüşçülərin meyitlərinin toplanması üçün Rusiya sülhməramlıları ilə iş aparılır”, – deyə Hikmət Hacıyev bildirib.