Azərbaycanın İrandan gözlədiyi addım | Onlar Bakıya təhvil verilir?

Azərbaycan-İran münasibətləri yeni mərhələyə qədəm qoyur.

Rəsmi Bakının Tehranla mehriban qonşuluq siyasəti qurmağa yönəlik səyləri son zamanlar iki ölkə arasında müəyyən xoş təmasların yaranmasına gətirib çıxarıb. Azərbaycan və İran hökumət nümayəndələrinin tez-tez bir araya gəlməsi, həmçinin yaxın zamanda Xudafərin körpüsündə dövlət rəsmiləri arasında görüş nəzərdə tutulması ölkələrarası əlaqələrin inkişafında yeni mərhələ açmaq niyyətindən xəbər verir.

Təmasların bu şəkildə inkişafı fonunda İranın hələ də rəsmi Bakının tələb etdiyi cinayətkarları ölkəmizə ekstradisiya etməməsi ciddi narazılıq yaradır. Məsələn, müxtəlif dövlət cinayətlərində ittiham edilən “Hüseyniyyun” qruplaşmasının üzvlərinin Azərbaycana təhvil verilməməsi həm qonşuluq münasibətlərinə, həm də beynəlxalq hüquq normalarına ziddir.

Rəsmi Bakı hər zaman cinayətkarlığa qarşı mübarizə sahəsində beynəlxalq konvensiyalara riayət edib, konkret cinayət törədən şəxslərin qarşı tərəfə təhvil verilməsi məsələsində əməli addımlar atıb. İranın özü ilə də bu faktlar kifayət qədərdir. Uzağa getməyək, elə 2020-ci ildə Azərbaycan 19 nəfər iranlını qarşı tərəfə təhvil verib.

Rəsmi Tehran isə konkret cinayət əməllərində ittiham edilən 20 nəfərin qaytarılması məsələsinin üstündən keçir. Hazırda İranda sərbəst fəaliyyət göstərən “Hüseyniyyun” qruplaşması Azərbaycana qarşı nifrət dolu açıqlamalarını davam etdirir. Halbuki rəsmi Bakı cinayətkar qruplaşmanın rəhbəri və üzvlərini dövlət əleyhinə cinayətlərə görə beynəlxalq axtarışa verib.

Həmin şəxslər indi də İran ərazisindədir və öz çirkin əməllərini oradan həyata keçirirlər. Azərbaycanın öz cənub qonşusundan gözlədiyi konkret tələb var – beynəlxalq axtarışda olan cinayətkarların Azərbaycana təhvil verilməsi. Konkret siyahı isə Tehrana çoxdan verilib.