Azərbaycanlıların amansızlıqla qətlinə kim əmr verib?

Rusiyada son illər getdikcə artan milli və etnik ayrı-seçkilik, şovinist yanaşmalar artıq çürük pomidorların geri qaytarılması kontekstindən çıxıb.

Bu dəfə nişangahda hədəf illərdir bu ölkə hüdudlarında yaşayan, dövlətə vergisini verən, iqtisadiyyatın inkişafına dəstək olan qeyri-ruslardır. Konkret olaraq söhbət iyunun 27-də Yekaterinburq şəhərində OMON-çular tərəfindən illər öncə işlənmiş cinayətə görə təqsirli bilinən azərbaycanlıların işgəncəyə məruz qalmasından gedir.

OMON-çuların başlatdığı dalğa həmyerlilərimizin öldürülməsi, bir neçə nəfərin ağır yaralanması və bir qrup şəxsin həbs olunmasına səbəb olub. Əlbəttə ki, hər bir ölkənin qanunvericiliyində törətdiyin əməldən asılı olmayaraq işgəncə faktı qəbulolunmazdır və azərbaycanlıların başına gətirilən isə bu yaşananların adi kriminal hadisə kontekstindən çıxaraq onu daha böyük bir prosesin tərkib hissəsi edir.

Tarix boyunca imperiya təfəkkürü ilə hərəkət edən rus siyasi elitası bu gün də eyni təzyiq modelini fərqli formalarda davam etdirir. Bu dəfə hədəfdə əsasən Qafqaz və Orta Asiya mənşəli müsəlman xalqlardır.

Qeyd edək ki, bu zorakılıq halları Rusiyada xüsusilə Ukraynada yaşadıqları məğlubiyyətin fonunda daha da artıb. Rusiya pravoslav kilsəsi bu şovinist siyasətin yalnız seyri ilə kifayətlənmir, əksinə, aktiv şəkildə ideoloji təbliğat aparır.

Kilsənin bəzi nümayəndələri qeyri-rus xalqları “milli təhlükə” kimi qələmə verərək, hüquq-mühafizə orqanlarının qəddarlığına mənəvi haqq qazandırmağa çalışırlar. Din adı altında edilən bu təxribatlar cəmiyyətdə milli və dini gərginliyi daha da dərinləşdirir və nifrətə zəmin yaradır.