Bakı Təşəbbüs Qrupu Fransanın qəddar siyasətini unutmur, unutdurmur - Baku TV

Fransanın Yeni Kaledoniyada kütləvi etirazları qəddarcasına yatırmasından iki il ötür.

Bu barədə Bakı Təşəbbüs Qrupunun sosial şəbəkələrdə paylaşdığı videomaterialda bildirilib.

Yerli sakinlərin – kanakların müstəqillik uğrunda mübarizəsi çərçivəsində baş verən etirazlar 2024-cü ilin yazında keçirilib.

Fransa parlamenti Yeni Kaledoniya ərazisində 10 ildən çox yaşayan şəxslərə regional seçkilərdə iştirak etmək hüququnun verilməsini nəzərdə tutan qanun layihəsini təsdiqləyib.

Buna cavab olaraq 2024-cü il mayın 13-də Yeni Kaledoniyanın paytaxtı Numeada nümayiş keçirilib. Yerli əhali bu qərarı Parisin arxipelaqda öz nüfuzunu gücləndirmək və onun müstəqillik əldə etməsinə mane olmaq cəhdi kimi qiymətləndirib.

Etirazlar fonunda Fransa hakimiyyəti Yeni Kaledoniyaya qoşun yeridib. Etirazçılara qarşı 30 ədəd zirehli avtomobil, 3 min hərbçi cəlb edilib.

"Fransa güc strukturları tərəfindən güc tətbiq edilməsi nəticəsində 14 nəfər ölüb, 3 min nəfər yaralanıb. 243 etirazçı həbs edilib", – deyə BTQ-nin məlumatında vurğulanıb.

2024-cü il 13 may hadisələrindən sonra Yeni Kaledoniyadakı vəziyyət beynəlxalq təşkilatlar tərəfindən ciddi narahatlıqla qarşılanıb.

Birləşmiş Millətlər Təşkilatının müvafiq qurumları Fransanın seçici korpusunu dəyişdirmək təşəbbüsünün kanak xalqının siyasi hüquqlarına, öz müqəddəratını təyinetmə hüququna və dekolonizasiya prosesinə zidd olduğunu vurğulayıb, Fransanı yerli xalqın razılığı olmadan siyasi dəyişikliklərdən çəkinməyə çağırıb.

BMT ekspertləri güc tətbiqi, kütləvi həbslər və repressiv tədbirlərlə bağlı narahatlıqlarını ifadə edərək bu məsələnin təhlükəsizlik deyil, beynəlxalq hüquq və dekolonizasiya məsələsi olduğunu vurğulayıblar.