Bakı təslim olan silahlıları bağışlayacaq: Hikmət Hacıyev "Reuters"ə müsahibə verib

“Bəzi hərbi birləşmələr müqavimət göstərməkdə davam edəcəklərini bildirsələr də, Bakı silahı yerə qoyan Qarabağ separatçılarına mümkün amnistiyanı nəzərdən keçirir”.

Bunu Azərbaycan Prezidentinin köməkçisi Hikmət Hacıyev “Reuters” agentliyinə açıqlamasında deyib.

“Hətta keçmiş hərbi qulluqçulara və komandirlərə - əgər onları belə təsnif etmək mümkündürsə - onlar üçün də amnistiyanı nəzərdən keçiririk və ya təklif edə bilərik”, – deyə H.Hacıyev bildirib.

O qeyd edib ki, hazırda bəzi ayrı-ayrı hərbi qruplaşmalar və komandirlər Bakının şərtlərini qəbul etməyəcəklərini və müqaviməti davam etdirəcəklərini açıq şəkildə bəyan ediblər.

Prezident Administrasiyasının Xarici siyasət məsələləri şöbəsinin müdiri əlavə edib ki, Qarabağın erməni əhalisi humanitar yardım istəyib. Onun sözlərinə görə, ərzaq və zəruri ləvazimatlar sentyabrın 22-də əraziyə çatdırılacaq. Hikmət Hacıyev vurğulayıb ki, Azərbaycan Qarabağın erməni sakinlərinin sülh yolu ilə reinteqrasiyasını istəyir.