Bakı və İrəvan üçün kritik gün | Paşinyan niyə Rusiyaya üz tutur?

Azərbaycan və Ermənistan arasında Vaşinqton sənədləri üzrə müzakirələr sentyabrdan başlayacaq.

Bunu Ermənistanın Baş naziri Nikol Paşinyan brifinqdə çıxışı zamanı bildirib.

"Hazırda heç bir müzakirə yoxdur. Vaşinqton sənədləri üzrə müzakirələr sentyabrdan başlayacaq", ‒ deyə o qeyd edib.

Baş nazir əlavə edib ki, Azərbaycan və Ermənistan arasında sülhün qurulması barədə bəyanatlar tərəflər arasında fikir ayrılıqlarının olmaması demək deyil.

"Sülhün bərqərar olduğunu deməyimiz o demək deyil ki, tərəflərin bir-birinə sualları qalmayıb. Heç vaxt münaqişə yaşamadığımız və dostluq əlaqələri qurduğumuz dövlətlərlə münasibətlərimizdə də bir-birimizə suallarımız yaranır", ‒ o vurğulayıb.

Baş nazir həmçinin qeyd edib ki, dövlətlərarası münasibətlərin qurulması və inkişafı prosesi "dinamikdir".

Nikol Paşinyann sentyabrın sonunda Rusiyaya səfər edə biləcəyini də deyib.

"Məni Moskvada gözlədiklərinə şadam, həmişə Rusiyaya səfərləri gözləyirəm, növbəti səfər sentyabr ayına planlaşdırılıb", ‒ deyə o əlavə edib.

Onun sözlərinə görə, Moskvaya səfərindən əvvəl Pekində Şanxay Əməkdaşlıq Təşkilatı çərçivəsində Rusiya Prezidenti Vladimir Putinlə təmaslar planlaşdırılıb.