BMT heyətini bölgəyə dəvət etmək şəffaf siyasətin göstəricisidir

Azərbaycanın keçirdiyi 23 saatlıq lokal xarakterli antiterror tədbirləri ölkə ərazisində suveren dövlət hüquqlarının tam şəkildə həyata keçirilməsini təmin edib. Bu əməliyyat böyük bir əraziyə nəzarət edən xunta rejiminin qanunsuz fəaliyyətinə son qoyub.

Separatçılar ağ bayraq qaldırıb təslim olandan sonra Azərbaycan bir daha humanizm prinsipləri sərgiləyərək erməniəsilli sakinlərin reinteqrasiyası üçün bütün zəruri addımları atdı. Lakin təəssüf ki, Ermənistanın mövcud hakimiyyəti və Qarabağdakı qondarma rejim bu dəfə də rəsmi Bakının humanizm siyasətini tam layiqincə dəyərləndirə bilmədilər.

Real vəziyyət budur ki, Azərbaycan erməniəsilli şəxsləri öz ərazisindən zorla çıxarmır, onlara hər hansı təzyiq göstərilmir. Öz xoşları ilə Azərbaycanı tərk edən erməniəsilli şəxslər beynəlxalq statuslu media qurumlarına açıqlamalarında bildirirlər ki, Xankəndidəki separatçı rejim və onun təsirində olan qüvvələr erməniəsilli sakinləri inandırırlar ki, bu cür kütləvi köç ermənilərin ümummilli maraqlarına uyğundur. Bütün bu baş verənlərdə yenə də saxta “Böyük Ermənistan” xülyası ilə bağlı yaramazlıqlar görünür.

Yeri gəlmişkən, Azərbaycan BMT-nin müvafiq qurumlarını Qarabağ bölgəsinə səfərə dəvət edib. Belə bir səfər yaxın günlərdə BMT-nin Azərbaycandakı rezident əlaqələndiricisinin himayəsi altında, BMT ilə Azərbaycan arasında Dayanıqlı İnkişaf üzrə Əməkdaşlığa dair Çərçivə sənədinə, yəni təşkilatın 2021-2025-ci illərə dair fəaliyyəti çərçivəsinə uyğun olaraq həyata keçiriləcək.

Məlum olduğu kimi, Ermənistan tərəfi uzun müddət ərzində Azərbaycan ərazilərinin işğalı zamanı işğal, dağıntı, qanunsuz məskunlaşmalar daxil olmaqla, qanunsuz fəaliyyətin nəticələri ilə yerində tanış olmaq məqsədilə BMT başda olmaqla beynəlxalq missiyaların işğal olunmuş ərazilərimizə səfərini hər zaman əngəlləyib və ya məhdudlaşdırıb.

Hətta məhdud missiyalardan sonra belə Ermənistan onların gəldiyi nəticələrə ya məhəl qoymayıb, ya da onları təhrif edib. Azərbaycan BMT missiyasını Qarabağ bölgəsinə dəvət etməklə açıq şəkildə bütün dünyaya göstərdi ki, cavab verə bilməyəcəyi heç bir sual, gizlədəcəyi heç bir məqam yoxdur.