Bu, Azərbaycanla yeni savaşa səbəb olacaq! – Ermənistan təcili göstəriş verdi

Qarabağda antiterror əməliyyatlarından bir il ötür.

Ötən il Xankəndidə məhv edilən separatçı dəstənin bir hissəsi həbs edilərək qanun qarşısına çıxarıldı, bir hissəsi isə İrəvana qaçdı. İrəvana qaçan separatçılar hələ də iddialarını davam etdirir.

Bu gün separatçılar məhv edilən qondarma rejimin “yas mərasimini” keçirməyə və Azərbaycana qarşı növbəti təxribata hazırlaşır.

Ləğv edilmiş qondarma rejimin sonuncu “başçısı” Samvel Şahramanyan dəstəsi ilə “Yerablur”a baş çəkəcək. Daha sonra “Müqəddəs xaç” kilsəsində görüş keçirəcək. Görüşdə qondarma Artsax ideyasının davam etdirilməsi, Azərbaycana qarşı atılacaq addımlar müzakirə olunacaq.

“Hraparak” nəşri yazır ki, bu addımlar rəsmi İrəvanda narahatlıq yaradıb. Ermənistan hakimiyyəti separatçıların fəallığını qəbul etmir, bu kimi fəaliyyətlərin Azərbaycanla qarşıdurmaya səbəb olacağını, nəticə etibarı ilə ölkənin təhlükəsizliyini təhdid etdiyini düşünür. Artıq hakimiyyətin bütün komandasına göstəriş verilib. Gün ərzində təbliğat ötən il Qarabağda baş verənlərə görə qondarma Artsax liderlərinin günahkar olduğu yönündə qurulacaq.

Nəşr iddia edir ki, Ermənistan hakimiyyəti separatçılar arasında daxili çəkişmələri qızışdırmaq üçün bütün imkanlarını işə salıb.