Bu ölkələr Suriyanın taleyi ilə bağlı hərəkətə keçdi | Parçalama siyasəti nəticə verəcəkmi?

Yaxın Şərqin növbəti qurbanı olan Suriyada yeni era başlayıb.

Post-Əsəd dövrü adlanan bu müddətin suriyalılar üçün heç də rahat keçməyəcəyinə isə artıq şübhə yeri qalmayıb.

Çünki bir tərəfdən ABŞ-İsrail, digər yandan Türkiyə, həmçinin Rusiya-İran tandemi bu ölkənin gələcəyi ilə bağlı həm sözlü, həm də fiziki hərəkətə keçib. Xüsusilə İsrail ABŞ-dən də aldığı rüsxətlə Suriya Ordusuna qarşı yüzlərlə aviazərbə endirib, həmçinin ölkənin cənubuna hücumları genişləndirməyə başlayıb.

Qeyd edək ki, İsrailin Baş naziri Benyamin Netanyahu işğal altında olan Qolan təpələrindən dünyaya verdiyi mesajda bildirib ki, ölkəsi buradakı bufer zonanı müvəqqəti nəzarətə götürüb. Təl-Əvivin məqsədi aydındır: Suriyanın hərbi gücünü minimuma endirərək yekunda ölkənin unitar quruluşunu dəyişmək və federal struktur yaratmaq.

Ekspertlərin versiyalarına görə, Suriyada mümkün parçalanma ssenarisində Fəratın şərqində – PYD/YPG-nin nəzarət etdiyi ərazilərdə kürd dövlətinin yaradılması və Şimali İraq Kürd Muxtariyyətinin də iştirakı ilə Aralıq dənizinə qədər məlum "Kürd dəhlizi" layihəsi aktuallaşa bilər.

Bəs bu ehtimal nə qədər güclüdür?