Cənubi Qafqaz üzrə yeni baş müşavir Bakıya gəlir

ABŞ Dövlət Departamentinin Cənubi Qafqaz üzrə yeni baş müşaviri Luis Bono gələn həftə regiona, o cümlədən Azərbaycana, Ermənistana və Gürcüstana ilk səfərini edəcək.

Bu barədə qurumun sözçüsü Ned Prays martın 3-də keçirdiyi brifinqdə bildirib: “Cənab Bono Ermənistan və Azərbaycan arasında sülh prosesini və Gürcüstanın suverenliyi və ərazi bütövlüyünə davamlı sadiqliyimizi dəstəkləmək üçün yüksək səviyyəli rəhbərliklə görüşməyi planlaşdırır. Luis Bono Cənubi Qafqazın hər üç ölkəsinə səfər edəcək. O, Bakıya, İrəvana və Tbilisiyə bu ardıcıllıqla gedəcək”.

Yeni baş müşavir Luis Bono dövlət katibi Entoni Blinken, Azərbaycan Prezidenti İlham Əliyev və Ermənistanın Baş naziri Nikol Paşinyan arasındakı Münhen Təhlükəsizlik Konfransı çərçivəsində baş tutan üçtərəfli görüşdə əldə edilən tərəqqini inkişaf etdirəcək.

Ned Prays həmçinin qeyd edib ki, ABŞ Azərbaycan və Ermənistanın sülh prosesində son günlərdəki səylərindən ümidlənib.