Ceyhun Bayramov Ermənistanın hərbi təxribatları barədə məlumat verib

Xarici işlər naziri Ceyhun Bayramov BMT-nin ən az inkişaf etmiş ölkələr üzrə Beşinci Konfransında iştirakı çərçivəsində Qananın xarici işlər və regional inteqrasiya naziri Şirley Ayorkor Botçveylə görüşüb.

Görüşdə ikitərəfli və çoxtərəfli platformalarda əməkdaşlıq gündəliyinə daxil olan məsələlər barədə fikir mübadiləsi aparılıb və gələcək potensial əməkdaşlıq istiqamətləri müzakirə edilib.

Ceyhun Bayramov Qanadan olan həmkarını postmünaqişə dövründə Ermənistan-Azərbaycan münasibətlərinin normallaşması prosesi, eləcə də regionda hazırkı təhlükəsizlik vəziyyəti barədə məlumatlandırıb.

Bildirilib ki, Ermənistan tərəfinin davam edən hərbi təxribatları, o cümlədən martın 5-də baş verən insident bir daha göstərir ki, bu ölkə regionda davamlı sülhün əldə olunmasında və Azərbaycanla qarşılıqlı hörmətə əsaslanan münasibətlərin qurulmasında maraqlı deyil.

Görüşdə o cümlədən Qoşulmama Hərəkatı çərçivəsində əməkdaşlıq məsələləri də müzakirə edilib. Hərəkatın təsisçi dövlətlərindən biri kimi Qananın təşkilatın fəaliyyətində aktiv iştirakı vurğulanıb. Bir neçə gün əvvəl Bakıda baş tutan Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşü və onun nəticələri barədə məlumat verilib.