Ceyms O`Brayndan İrəvan-Bakı münasibətləri barədə açıqlama

“Ümid edirik ki, çox yaxında tərəflərin sülh razılaşmasını əldə etdiklərinin şahidi olacağıq”.

Bunu ABŞ dövlət katibinin Avropa və Avrasiya məsələləri üzrə müavini Ceyms O`Brayn deyib.

Ceyms O`Brayn hər iki tərəfin sülh sazişini imzalamaqda maraqlı olduğunu bildirib:

“Biz, eləcə də Avropa İttifaqı tərəfdaşlarımız və digərləri kömək etməyə hazırıq. Biz istərdik ki, bütün bunlar tezliklə sona çatsın, çünki erkən sülh böyük fayda gətirəcək”.

Azərbaycan və Ermənistan xarici işlər nazirlərinin Vaşiqnton görüşü ilə bağlı mövqeyini açıqlayan amerikalı diplomat deyib ki, Bakı ilə İrəvan arasında sülh sazişinin bağlanmasını dəstəkləməkdən çox xoşbəxtdirlər:

“Biz artıq iki ölkənin xarici işlər naziri arasında sülh danışıqlarının bir neçə raunduna ev sahibliyi etmişik və tərəflər sülhün əldə edilməsinə kömək edəcəyinə qərar versələr, bunu yenidən edəcəyik. Biz kömək etməyə hazırıq. Biz hər iki tərəfi görüşməyə təşviq edirik və onlar da buna hazır olduqlarını bildiriblər”.

Nazirlərin görüşünün bu ilin sonunadək baş tutub-tutmayacağına gəldikdə Ceyms O'Brayn bildirib ki, bu il üçün kifayət qədər vaxt qalmayıb, amma əllərindən gələni edəcəklər.