Çingiz Qənizadə İsrail-Fələstin savaşı ilə bağlı BMT-ni tənqid atəşinə tutdu

Fələstinlə İsrail arasında oktyabrın 7-də başlayan növbəti qarşıdurma bir məsələni yenidən gündəmə gətirdi.

Söhbət Birləşmiş Millətlər Təşkilatının Təhlükəsizlik Şurasının münaqişə ilə bağlı qəbul etdiyi qətnamələrdən gedir. Təxminən 6 milyon fələstinli qaçqının öz yurduna qayıtmaq hüququ ilə bağlı BMT-nin çıxardığı bu qərarların sayı 110-a çatsa da, indiyə kimi heç biri icra olunmayıb.

Qeyd etmək yerinə düşər ki, uzunmüddətli müharibələrdə münaqişə tərəfləri arasında sülh və sabitliyi təmin etmək üçün beynəlxalq mandata sahib olan sülhməramlı qüvvələrin fəaliyyətindən istifadə olunur. Bunun bir çox nümunəsi də mövcuddur. Məsələn, Əfqanıstanda, Kosovada, Şimali Kiprdə və digər problemli ərazilərdə bu proses həyata keçirilir.

Bəs analoji fəaliyyət Fələstin və İsrail problemi üçün niyə istifadə edilmir? Təbii ki, beynəlxalq mexanizmlər hüquqa uyğun fəaliyyət göstərsəydi, vaxtilə Ermənistanın işğal etdiyi Azərbaycan ərazilərini qeyd-şərtsiz tərk etməsi ilə bağlı BMT-nin 4 qətnaməsini ölkəmiz öz gücünə reallaşdırmazdı. Görünən odur ki, İsrail-Fələstin münaqişəsində də tərəflər problemin həllinə öz səyləri ilə nail olacaqlar.