Dünya kütləvi qırğın silahları ilə təhdid olunur | Böyük güclərin kiçik dövlətlərlə bağlı planı

Dünya yenidən dizayn edilir və artıq bu, şübhə doğurmayan bir reallıqdır. Dünyada tez-tez alovlanan münaqişə ocaqlarının daha da körüklənməsi bunun göstəricisidir.

Sözügedən münaqişələrin mərkəzində isə sanki eyni dövlətlər yer almaqdadır – ABŞ və Avropa ölkələri. Elə Ukrayna-Rusiya arasında yaşanan gərginliyin mərkəzində də Ukraynanın böyük qüvvələr tərəfindən dəstəklənməsi ritorikası, onların NATO təlimlərinə cəlb olunması dayanır.

İndi də üzdə məsum görünən, lakin heç də xoşniyyətli olmayan bu dəstəyin yaratdığı təhdid Cənubi Qafqazın sərhədlərindədir.

Siyasi analitik Cavid Vəliyevin sözlərinə görə, beynəlxalq münasibətlər sistemində dövlətlər öz maraqlarına görə davranır. Amma sözügedən dövlətlərin ədaləti təmin etdiyini demək doğru deyil:

“Təəssüflər olsun ki, burada beynəlxalq hüququn təməl prinsipləri də pozulur. Məhz Qərb dövlətləri tərəfindən İkinci Dünya müharibəsindən sonra onların iştirakı ilə beynəlxalq hüquq sistemi yaradılıb.

Problem orasındadır ki, sözügedən dövlətlər beynəlxalq hüquq sistemini öz maraqlarına görə poza bilir. Məsələn, Ukrayna məsələsində Ukraynanın ərazi bütövlüyünü müdafə edib, Azərbaycan-Ermənistan münasibətlərində fərqli davranırlar. Artıq köklü şəkildə dəyişikliyə ehtiyac var. Yəni BMT Təhlükəsizlik Şurasından başlayaraq bu dəyişiklik olmalıdır ki, bəlkə, gələcəkdə dünyada ədalət təmin edilsin”.