Dünya mediası tarixi zəfərimizdən nə yazır?

Sentyabrın 19-da başlayan və cəmi 23 saata yaxın davam edən antiterror tədbirləri ilə Azərbaycanın suverenliyi bərpa olunub.

Bunun davamı olaraq isə oktyabrın 15-də Ali Baş Komandan İlham Əliyev həmin ərazilərimizdə Azərbaycan bayrağını dalğalandırıb. Bu tarixi hadisə nəinki ölkə, bütün dünya gündəmini zəbt edib.

Türkiyə kimi dost və qardaş ölkələrlə yanaşı, ABŞ və Avropa dövlətlərinin mətbu orqanlarının manşetlərini bəzəyib. Türkiyənin “Anadolu” və “İhlas” xəbər agentlikləri, həmçinin “CNN Türk” “Prezident İlham Əliyev Xankəndi və Xocalıda Azərbaycan bayrağını göylərə ucaltdı” başlıqlı yazılar dərc edib. NTV telekanalı oktyabrın 15-i tarixini Azərbaycan üçün əlamətdar gün adlandırıb və bildirilib ki, separatçı rejimin bir vaxtlar özünə “paytaxt” seçdiyi Xankəndi şəhəri indi doğma əllərdədir.

“France 24” isə xəbər verib ki, “Qarabağda Azərbaycanın arzuları gerçəkləşdi”. Ali Baş Komandanın Xankəndidə çəkilən bir neçə fotosu da məqalədə yer alıb. “Liberation”da dərc olunan məqalədə separatçı rejim üzərindəki qələbəmiz xüsusi qeyd olunub və Xankəndidə artıq Azərbaycan bayrağının dalğalandırıldığına diqqət çəkilib. “ABC News” da Xankəndidə bayrağımızın dalğalandırılması və suverenliyimizin tam bərpa edilməsi barədə xəbəri manşetə çıxarıb.

Beynəlxalq aləmdə Azərbaycan ərazisi kimi tanınan bu torpaqların artıq rəsmi Bakının nəzarəti altında olduğu oxuculara çatdırılıb. “Reuters”, “The Washington Post”, “SkyNews” kimi nüfuzlu dünya mətbu orqanları da bu xəbəri diqqətdən kənar qoymayıb, manşetlərini Xankəndi və Xocalıda dalğalandırılan Azərbaycan bayrağı ilə bəzəyib.