Ərdoğan və Paşinyan arasındakı danışığın təfərrüatı | Politoloqdan açıqlama

Türkiyə Prezidenti Rəcəb Tayyib Ərdoğanla Ermənistanın Baş naziri Nikol Paşinyan arasında telefon danışığı olub.

Söhbət zamanı ən diqqətçəkən məqam tərəflərin iki dövlət arasında ilkin şərt olmadan münasibətlərin tam şəkildə normallaşdırılması üçün siyasi iradələrinin olduğunu vurğulaması olub.

Bu kontekstdə liderlər ölkələrinin xüsusi nümayəndələri arasında danışıqların davam etdirilməsinin vacibliyinə diqqət çəkib və indiyə qədər razılaşdırılan məsələləri təsdiqləyiblər.

Təbii ki, Ermənistanda da yaxşı başa düşürlər ki, ölkənin böhrandan çıxması üçün Azərbaycan və Türkiyə ilə münasibətlərin normallaşdırılmasına, xüsusən də davamlı sülhə ehtiyac var. Bu baxımdan N.Paşinyanın telefon danışığı həm də bu məsələni yenidən gündəmə gətirir.

Münasibətlərin inkişafı ilk növbədə regionda sabitliyə və sülh sazişinin imzalanmasına töhfə verəcək. Bunun üçün isə uzun illər ərzində yığılıb qalan ziddiyyətli məsələlər həllini tapmalı, xüsusilə də Ermənistan Azərbaycan və Türkiyəyə qarşı ərazi iddialarından əl çəkməlidir ki, əməkdaşlıq imkanları daha da genişlənsin.