Ərdoğan Zəngəzur dəhlizindən danışdı | Cənubi Qafqazda münaqişə yox, sülh istəyirik...

“Azərbaycan və Ermənistan arasında sülhün yaxın olması bizi sevindirir”.

Bu fikirləri Türkiyə Prezidenti Rəcəb Tayyib Ərdoğan Azərbaycandan qayıdarkən təyyarədə jurnalistlərə açıqlamasında bildirib.

“Biz artıq Cənubi Qafqazda münaqişə deyil, sülh və əmin-amanlıq görmək istəyirik. Əldə olunacaq sülh Azərbaycan, Ermənistan və ölkəmiz üçün faydalı olacaq. Biz Ermənistanla da ehtiyatlı normallaşma prosesindən keçirik. Yəni bu məsələ ilə bağlı zərrə qədər narahatlıq yoxdur”, – deyə o qeyd edib.

Türkiyə Prezidentinin sözlərinə görə, Zəngəzur dəhlizinin yaxın vaxtlarda açılması Cənubi Qafqazın nəqliyyat və enerji infrastrukturunu da möhkəmləndirəcək:

“Zəngəzur dəhlizi Azərbaycan üçün yalnız Naxçıvanla quru əlaqəsi yaratmaq imkanı deyil, həm də Türkiyə üzərindən Türk dünyasına uzanan yeni inteqrasiya xəttidir. Regionumuzda sülhə, təhlükəsizliyə və inkişafa xidmət edəcək bu addımları İranın da dəstəkləyəcəyinə ümid edirik. Atılan hər addım, açılan hər qapı və dəhliz iqtisadi qazanc verəcək və zaman keçdikcə ölkələri bir-birinə daha da yaxınlaşdıracaq”.

R.T.Ərdoğan həmçinin Azərbaycanın işğaldan azad edilmiş ərazilərinin bərpa və inkişafında Türkiyənin atdığı addımları qətiyyətlə dəstəklədiyini vurğulayıb.