Ərdoğandan Ermənistana çağırış | Fransanın cəhdləri nəticəsiz qalacaq

Türkiyə Prezidenti Rəcəb Tayyib Ərdoğan Fransanın Ermənistanı aldatdığını deyərək rəsmi İrəvanı təxribatlara getməməyə çağırıb.

Dövlət başçısı Yunanıstandan qayıdarkən təyyarədə jurnalistlərə açıqlamasında bildirib ki, rəsmi Paris Ermənistanı təhrik edir. Fransanın daha əvvəl də Ermənistana dəfələrlə dəstək verdiyini deyən R.T.Ərdoğan bunun heç bir nəticəsi olmadığını qeyd edib.

“Hətta Fransa ATƏT-in keçmiş Minsk Qrupunun həmsədri kimi də nəyəsə nail ola bilməyib. İndi isə yenidən Ermənistanı təhrik edir. Zirehli texnikalar versə nə olacaq ki?! Bunun da nəticəsi olmayacaq. Çünki artıq öz torpaqlarını işğaldan azad etmiş Azərbaycan var. Daha əvvəl Ermənistana göndərilən tanklar, toplar, tüfənglər Azərbaycanın əlinə keçib. Fransa Ermənistanı aldadır”, – deyə Türkiyə lideri bildirib.

R.T.Ərdoğanın sözlərinə görə, Ermənistan hakimiyyəti yaxın keçmişdə baş verənlərdən nəticə çıxarmalıdır.

“Ermənistan təxribatlara getməməlidir. Sülh imkanlarını dəyərləndirməsi və bəzi ölkələrin tələsinə düşməməsi İrəvanın xeyrinə olar. Azərbaycanla sülh Ermənistan üçün ən yaxşı yoldur. Əllərinə silah verənlər Ermənistanı tək qoyacaqlar”, – deyə Türkiyə Prezidenti bildirib.