Erməni fəal: Minlərlə insan Paşinyanı devirəcək

Tanınmış erməni fəal İşxan Verdyan bu dəfə Ermənistanın Baş naziri Nikol Paşinyanı ölkədə süni təşviş yaratmaqda, insanları yersiz qorxuya salmaqda ittiham edib.

O bildirib ki, Baş nazir bir tərəfdən Azərbaycan ilə sülh müqaviləsini bağlamaq istədiyini bəyan edir, digər tərəfdən isə azərbaycanlıların Qarabağda yaşayan ermənilərə qarşı soyqırımı törətmək fikrində olduğunu deyir:

“İnsanlar da haqlı olaraq ondan soruşurlar ki, əgər dediyin kimi ermənilərə qarşı soyqırımı olacaqsa, sən hansı sülhdən danışırsan? İnsanları niyə aldadırsan? N.Paşinyan bunun nə ilə nəticələnəcəyini başa düşmür. Düşünün, Qarabağda yaşayan minlərlə erməni heç vaxt Ermənistanı və N.Paşinyanı sevməyib. Onlar hazırda qorxu içindədirlər, bir gün toplaşıb Ermənistana gəlsələr, nələrin baş verəcəyini təsəvvür edirsiniz? Minlərlə insan İrəvanı blokadaya alacaq və N.Paşinyanı devirəcəklər. Bu qaçılmazdır! N.Paşinyanın sərsəm açıqlamalarına görə təşvişə düşən, evlərindən, işlərindən məhrum olan ermənilər gəlib İrəvanda “bomj” kimi yaşayacaqlar”.

İ.Verdyan qeyd edib ki, dünyanın nəhəng ölkələri Qarabağın Azərbaycanın ərazisi olduğunu qəbul etsələr də, ermənilər bunu başa düşməkdə hələ də çətinlik çəkirlər: “Niyə hər kəs baş verənləri olduğu kimi qəbul edir, bir tək Ermənistanda insanlar yalanlara boyun əyirlər? Başa düşün ki, siz heç bir zaman Azərbaycana qalib gələ bilməyəcəksiniz. Hörmət və müraciət etdiyiniz, kömək diləndiyiniz ABŞ, Şarl Mişel, hətta Vladimir Putin açıq şəkildə bəyan edir ki, Qarabağ Azərbaycandır. Hər kəs rəsmi olaraq bunu qəbul edir, bundan başqa nə istəyirsiniz axı?”.

İ.Verdyan əlavə edib ki, N.Paşinyan siyasətinin nəticəsi olaraq Ermənistanda vəziyyət günü-gündən daha da pisləşəcək. Yaranmış vəziyyətdən yeganə çıxış yolu isə Azərbaycanla sülh sazişini bağlamaqdır.