Erməni fəal ölkəsinin gələcək aqibətini şərh edib

“Bakı və İrəvan arasında sülh müqaviləsinin imzalanması ilə bağlı danışıqlar daha da sürətlənib və bu proses artıq dayandırılmayacaq”.

Bu barədə erməni fəal İşxan Verdyan Baku TV-yə müsahibəsində Moskvada Azərbaycan və Ermənistan xarici işlər nazirləri arasında keçirilən görüşün nəticələrini şərh edərkən bildirib.

Onun sözlərinə görə, məlum görüşdən sonra Ermənistanın Baş naziri Nikol Paşinyanın verdiyi bəyanatlar çox şeydən xəbər verir.

“Düşünürəm ki, bu gün iki ölkə heç vaxt olmadığı qədər sülh müqaviləsinin imzanlamasına yaxındır. Bunu bir çox faktlar deməyə əsas verir. Onlardan ən vacibi mayın 22-də Paşinyanın mətbuat konfransında verdiyi açıqlamalardır. O, artıq dediklərini əvvəlki kimi inkar edə bilməyəcək. Bu da ondan xəbər verir ki, Bakı-İrəvan münasibətlərinin normallaşması prosesində qlobal irəliləyiş var. Bu irəliləyiş geri dönüşü olmayan güclü sürət alıb. Bunun Nikol Paşinyan üçün yaxşı olmayacağını əvəllər də qeyd etmişdim. Çünki onun sülh müqaviləsini imzalamasına mane olmağa çalışacaqlar. Bəlkə də imza atmadan öncə onu devirəcəklər, çünki onun bu müqaviləni imzalamağa doğru getdiyi artıq hər kəsə məlumdur. Sülh sazişi imzalanmasa da, Azərbaycan istənilən halda istədiyini alacaq, Ermənistan isə dövlətçiliyini itirərək daşnakların əlinə keçəcək. Sülhə hər hansı maneə olsa, bu, yalnız Ermənistan tərəfindən ola bilər”, – deyə o qeyd edib.

Erməni fəal həmçinin vurğulayıb ki, iki ölkə arasındakı mövcud vəziyyət yaxın zamanda yaxşı tərəfə dəyişəcək.