Erməni fəal: Rusiya Ermənistanı istənilən anda vura bilər

Son günlər Moskva və İrəvan arasında yaşanan soyuq münasibət fonunda Rusiya Xarici İşlər Nazirliyinin rəsmi nümayəndəsi Mariya Zaxarovanın səsləndirdiyi fikirlər birmənalı qarşılanmayıb.

Rusiyanın Ermənistana qarşı ədavətli münasibətinin olmadığını xatırladan nazirlik sözçüsünün İrəvanın verdiyi bəyanatlarda və səsləndirdiyi fikirlərdə daha diqqətli olmasını, eləcə də Ermənistanda qəbul edilən yanlış qərarların onlar üçün təhlükəli ola biləcəyini deməsi siyasi analitiklər tərəfindən ciddi xəbərdarlıq kimi dəyərləndirilib.

Bəs tərəflər arasında artan gərginlik və soyuq münasibətin sonu nə ilə nəticələnə bilər?

Rusiyalı politoloq Boqdan Bezpolkon bildirib ki, Nikol Paşinyan Qarabağdan imtina etmək istəyir: “Bu münaqişə həm erməni xalqını, həm də ölkənin siyasi elitasını çox yorub. Qarabağa dair iddialarda haqsız olduqlarını özləri də anlayırlar. Amma satqın və xalq düşməni görünməkdən qorxduqları üçün bunu Rusiyanın əli ilə həyata keçirmək istəyirlər və bu istək tərəflər arasında münasibətlərin pisləşməsinə gətirib çıxara bilər. Belə olan halda , Ermənistan Qərbə meyil edərək Azərbaycanla müharibəyə qərar vermiş olsa, bu, onların növbəti məğlubiyyəti olacaq. Ermənistanın təhlükəsizliyinin qarantı Rusiya və Kollektiv Təhlükəsizlik Müqaviləsi Təşkilatı idi. Qərbin təkidi ilə Ermənistan KTMT-dən imtina etsə, o zaman heç bir ölkə Ermənistana kömək əlini uzatmayacaq”.

“Bir zamanlar Rusiya bizim böyük qardaşımızdır” deyən Ermənistan hakimiyyətinin indi Qərbə doğu meyil etməsini İrəvanın Moskvaya xəyanəti kimi də qəbul edənlər var. Proseslərin necə cərəyan edəcəyini isə zaman göstərəcək.