Erməni qəzetindən Münxendəki görüşlə bağlı sensasiyalı açıqlama

“Həmişə olduğu kimi, İlham Əliyev bu dəfə də Münxendə Nikol Paşinyanla danışıqlar zamanı üzündə həqarətli təbəssümlə oturdu. O, hər şeyin öz planı üzrə getdiyini bilirsə, niyə də olmasın?”.

Bu barədə “Ermənistanın səsi” qəzetində yayımlanan məqalədə deyilir.

Məqalədə “İ.Əliyev Münxendə nəyə nail oldu?” sualına bu cür cavab verilib:

“Bakı-İrəvan münasibətlərinin indi vasitəçisiz tənzimləndiyi etiraf edildi. Azərbaycan Prezidenti bu barədə ATƏT sədrinə məlumat verdi və sonuncunu Minsk qrupunu rəsmən ləğv etməyə, fəaliyyətdə olan sədrin xüsusi nümayəndəsi vəzifəsinə xitam verməyə dəvət etdi.

Azərbaycan lideri onunla N.Paşinyan arasında əsas müzakirələrin ikitərəfli formatda aparılması şərti ilə Olaf Şoltsun vasitəsilə görüşə razılaşdı, amma Almaniya Kansleri tezliklə oradan ayrılaraq zavallı N.Paşinyanı İ.Əliyevlə tək qoydu.

Faktdır ki, İ.Əliyev N.Paşinyanla yalnız ikitərəfli platformada danışmaq niyyətindədir. N.Paşinyanla daha asandır. Amma bu ikitərəfli platformanın sonuncu olacağı fakt deyil.

Mümkündür ki, müəyyən müddətdən sonra Azərbaycanla güzəştlə bağlı danışıqlar yenidən üçtərəfli formatda aparılsın. Yalnız bu dəfə Ankara-İrəvan-Bakı formatında.

İ.Əliyevin həqarətli gülüşünə təsəlli olaraq Britaniya Xarici Kəşfiyyatının (Mİ6) rəhbəri Riçard Mur N.Paşinyanla görüşüb. Demək olar ki, vacib heç nə danışılmayıb, yəqin ki, N.Paşinyan Armen Sarkisyana salamını çatdırıb”.