Erməni təxribatını dəstəkləyən Parisə cavab

“Fransanın Avropa və Xarici İşlər Nazirliyinin Ermənistanın aprelin 11-də Laçın rayonu istiqamətində yerləşən mövqelərimizə qarşı təxribatı ilə əlaqədar Ermənistanı dəstəkləyən 12 aprel tarixli bəyanatı reallığı əks etdirmir”.

Azərbaycan Xarci İşlər Nazirliyinin sözçüsü Ayxan Hacızadə Fransanın Ermənistanın təxribatlarını dəstəkləyən bəyanatını şərh edərkən belə deyib. XİN sözçüsü bildirib ki, Fransa bu bəyanatla növbəti dəfə qeyri-ədalətli mövqe nümayiş etdirib.

“Üçtərəfli bəyanata və Fransa Prezidentinin də iştirakçısı olduğu Praqa görüşünün nəticələrinə uyğun olaraq Ermənistanı Azərbaycanın ərazi bütövlüyü və suverenliyinə hörmət etməyə çağırmayan, Azərbaycan ərazilərindən erməni silahlı qüvvələrini çıxarmağı Ermənistandan tələb etməyən Fransa tərəfinin birtərəfli əsasda yalnız Ermənistanın ərazi bütövlüyünə hörmət edilməsinin vacib olduğunu bəyanatda bildirməsi Fransanın ölkəmizə qarşı qərəzinin nümunəsidir”, – deyə o qeyd edib.

Azərbaycanın xarici diplomatiya idarəsi həmçinin Fransanı Ermənistanı növbəti təxribatlara təhrik edən, revanşist qüvvələrə dəstək verən bu kimi bəyanatlardan çəkinməyə çağırıb.