Erməni türkoloq Almatı görüşünü şərh etdi | Qərb kimi dəstəkləyir?

Ermənistan və Azərbaycan xarici işlər nazirlərinin Almatıda keçirilməsi gözlənilən mümkün görüşünü bu dəfə erməni türkoloq Varujan Geqamyan şərh edib.

O, açıqlamasında Ararat Mirzoyanı məğlub ölkənin nümayəndəsi adlandırıb. Hətta deyib ki, Ermənistan tək, vasitəçisiz, çətin vəziyyətlə üzləşəcək. Çünki haqsız tərəf olaraq səsi zəif çıxacaq, arqumentləri əsassız olacaq:

“Adətən daha zəif və daha həssas tərəfin maraqlarını qorumaq üçün vasitəçi tələb olunur, lakin indiki vəziyyətdə Ermənistan beynəlxalq birliyin dəstəyinə arxalana bilməyəcək və mövcud şəraitə uyğun olaraq addım atmalı olacaq.

Türkiyə və Azərbaycan vasitəçilik platformasının mövcudluğunu istisna edən bir formatın yaradılmasına nail oldular ki, nəticədə Ermənistan onu məğlub edən iki ölkə ilə birbaşa təmasda olacaq. Ona nə Qərb, nə də başqası kömək edəcək. O, dəstək tapa bilməyəcək. Ermənistan bu gün Türkiyənin təsir zonasına çevrilib”.

Xatırladaq ki, bir müddət öncə Ermənistan XİN-ə istinadən yerli KİV məlumat yayaraq bildirib ki, rəsmi İrəvan Qazaxıstanda planlaşdırılan görüşə razıdır. Tərəflər də moderator olmadan təkbətək danışıqlar masası arxasında oturaraq iki ölkə arasındakı gərginliyi aradan qaldırmağa hazırdır.