Ermənilər Qarabağa qayıdacaq? | Şərtlər açıqlandı

Rusiya Xarici İşlər Nazirliyinin sözçüsü Mariya Zaxarova sülhməramlıların Qarabağda qalması və ora erməni əhalinin qaytarılması məsələsinin Moskva ilə Bakı arasında müzakirə ediləcəyini bəyan edib.

Əslində Prezident İlham Əliyev də dəfələrlə Azərbaycan vətəndaşlığını qəbul etmək istəyən Qarabağ ermənilərinin qayıtması üçün heç bir əngəl olmadığını deyib.

Hətta erməni sakinlərin qeydiyyata alınması məqsədilə portal da yaradılıb. Azərbaycan qanunlarını qəbul edən və xalqımıza qarşı cinayətlərdə iştirak etməmiş ermənilər ASAN xidmətə müraciət edə və müvafiq qaydada sənədlərini təqdim edə bilərlər.

Politoloq Zaur İbrahimli bildirib ki, vətəndaşlıq üçün müraciət edən ermənilər müsahibələrdən keçməlidir: “Azərbaycan Respublikasının Konstitusiya quruluşu əleyhinə çıxmış, AR hərbi qüvvələri ilə döyüşmüş, mülki əhaliyə qarşı cinayətlərdə iştirak etmiş şəxslər AR vətəndaşlığını ala bilməzlər. Bununla bağlı AR xüsusi xidmət orqanlarında müvafiq məlumatlar var”.

Rəsmi Bakı həmçinin şərt qoyub ki, Ermənistan Qarabağa qayıtmaq istəyən ermənilərin yenidən separatçılığa meyillənməyəcinə dair Azərbaycana zəmanət verməlidir. Ancaq bu günlərdə İrəvanda “Qarabağda erməni separatizminin başlanğıc günü” qeyd edilib və Qarabağdan Ermənistana qaçan keçmiş separatçıların sonuncu “rəhbəri” olmuş Samvel Şahramanyan da orada iştirak edib. Yəni belə anlaşılır ki, Ermənistanda hələ də separatçı zehniyyət mövcuddur və onlar Qarabağa qayıdacaqlarına ümid edirlər.