Ermənilərin sabahı Azərbaycan işığı ilə aydınlanacaq

2023-cü il sentyabrın 21-də Yevlaxda Azərbaycanın Qarabağ bölgəsində yaşayan erməni sakinlərin nümayəndələri ilə keçirilən görüşdə müzakirə edilən məsələlərin həlli istiqamətində təxirəsalınmaz işlər davam etdirilir. Bu barədə Prezident Administrasiyası məlumat yayıb.

Növbəti addım olaraq, Xankəndi şəhərinin Ermənistanın enerji sistemindən ayrılaraq Azərbaycan enerji sisteminə qoşulması təmin edilib.

Qeyd edək ki, hələ 2021-ci ildə "Azərenerji" tərəfindən tikilən və Prezident İlham Əliyevin iştirakı ilə istifadəyə verilən Şuşa yarımstansiyasında Xankəndi üçün ehtiyat yuvalar quraşdırılmışdı.

2023-cü il sentyabrın 19-dan etibarən Azərenerji tərəfindən Şuşa yarımstansiyası yaxınlığında əlavə 110 kV-luq yüksək gərginlikli dayaqların quraşdırılmasına və Xankəndi xətti ilə əlaqələndirilməsi işinə başlanılıb. Aparılan işlər nəticəsində artıq proses yekunlaşıb.

Paralel olaraq "Azərenerji" və "Azərişıq" əməkdaşları ötürücü və paylayıcı şəbəkəni, mühafizə sistemlərini təftiş etdikdən sonra xəttə gərginlik verilib. Xankəndidə artıq Azərbaycan işığı yanır.