Ermənipərəst politoloq regiondakı son vəziyyəti şərh etdi

“Azərbaycanın Ermənistanla münasibətləri həll etmək üçün Vaşinqtonda keçiriləcək görüşdə iştirakdan imtina etməsi müəyyən tendensiya formalaşdırdı, çünki Bakı əvvəllər Qranada və Brüsseldə danışıqlardan imtina etmişdi”.

Bu sözləri rusiyalı ermənipərəst politoloq Sergey Markedonov öz məqaləsində yazıb.

Onun fikrincə, Avropa danışıqları xətti ilə gedən Amerika da müəyyən problemlərlə üzləşəcək:

“Bütün bu ittihamların ümumi motivi var. Oktyabrda Azərbaycan Prezidenti Fransanın ermənipərəst yanaşmasından narazılığını bildirdi. Noyabrda rəsmi Bakı nümayəndələri bəyan etdilər ki, ABŞ-nin yanaşması birtərəflidir və bu, ABŞ-nin vasitəçilik rolunu şübhə altına alır.

Hər şey ondan başladı ki, ABŞ dövlət katibinin köməkçisi Ceyms O’Brayn Konqresdə keçirilən dinləmələrdə Vaşinqtonun Azərbaycana hərbi yardımı dayandırdığını, həmçinin bir sıra mühüm səfərləri ləğv etdiyini dedi. ABŞ hakimiyyətinin bu addımını İrəvan və Bakı arasındakı danışıqlarda inkişafın olmaması ilə izah edib. Klassik tərzdə desək, diplomatik cəbhədə heç bir dəyişiklik yoxdur”.

Politoloq xatırladıb ki, Ceyms O’Brayn ölkəsinin Bakıya Ermənistana qarşı sərt addımlarının qəbuledilməz olduğu barədə xəbərdarlıq etdiyini də bildirib:

“Vaşinqton Paris kimi indi bu ideyanı fəal şəkildə erməni tərəfinə təbliğ edir, deyirlər ki, “Qarabağ” başqa şeydir – burada söhbət Azərbaycanın ərazi bütövlüyünün pozulmasından gedir, amma “Ermənistanın nüvəsi” qırmızı xəttdir.

Ermənistan hakimiyyəti bu ritorikanı müsbət qəbul edir. Hətta bunu Moskvadan dəqiq təkliflərin olmamasına qarşı qoyurlar. Halbuki bu gün Ermənistanın təhlükəsizliyinin təminatçısı Rusiyadır. Bu cür təminatın keyfiyyəti müzakirə edilə bilər, ancaq Qərbin bəyanatlardan başqa heç bir real mexanizmi yoxdur”, – S.Markedonov deyib.