Ermənistan cəmiyyətindən gizlədilən həqiqət | Paşinyanın xəyanəti üzə çıxdı?

“Ermənistan Baş naziri Nikol Paşinyan Zəngəzur dəhlizi ilə bağlı imzalanmış müqaviləni ictimaiyyətdən gizlədir”.

Bunu Ermənistanın müxalif Erməni Milli Konqresi Partiyasının sədrinin müavini Levon Zurabyan deyib.

Siyasətçi xatırladıb ki, Paşinyan avqustun 8-də Vaşinqtonda Azərbaycan, ABŞ və Ermənistan arasında üçtərəfli bəyannaməyə əlavə olaraq, ABŞ və Ermənistan arasında üç ikitərəfli memorandum da imzalayıb:

“Birinci “Sülh qovşağı” layihəsinin imkanlarının inkişafı sahəsində tərəfdaşlıq haqqında, ikinci süni intellekt və yarımkeçiricilər sahəsində innovativ əməkdaşlıq haqqında, üçüncü enerji təhlükəsizliyi sahəsində tərəfdaşlıq haqqında. Paşinyan və komandasının gecə-gündüz “böyük nailiyyət” kimi təqdim etdiyi bu üç memorandumdan heç biri imzalandıqdan 12 gün sonra çap olunmayıb.

Paşinyan avqustun 21-də keçirdiyi mətbuat konfransında Vaşinqton razılaşmalarının bütün məzmununun üçtərəfli bəyannamənin bir səhifəsində əksini tapdığını göstərməyə çalışıb və əldə olunan razılaşmalara yalnız bəyannamənin mətni əsasında qiymət verməsini təklif edib”.

Paşinyanın sözlərinin əksinə olaraq Zurabyan bildirib ki, Zəngəzur dəhlizinin 99 illik icarəsi ilə bağlı sövdələşmə mətni cəmiyyətdən gizlədilən birinci memorandumda təsvir olunub:

“İkinci və üçüncü memorandumlar isə dərc olunub. Bu da birinci sənədin mətninin gizlədilməsi faktını təsdiqləyir”.