Ermənistan ordusunun Qarabağda mövcudluğu davam edir

“Qisas-2” əməliyyatı nəticəsində Qarabağda qanunsuz hərbi birləşmələrin 5 üzvü məhv edilib. Azərbaycan tərəfi humanizm prinsiplərindən çıxış edərək həmin cəsədlərin Ermənistana qaytarılmasını təmin edəcək və bu istiqamətdə sülhməramlılarla müvafiq təmaslar davam edir.

Özlərinin də etiraf etdiyi kimi, məhv edilən hərbçilərdən ikisi Ermənistan Silahlı Qüvvələrinin hərbçiləridir. Bu fakt bir daha sübut edir ki, Nikol Paşinyan və digər rəsmilər nə qədər inkar etməyə çalışsalar da, Ermənistan Ordusunun Qarabağda fiziki mövcudluğu davam edir.

Təbii ki, baş verənlər Paşinyan hökumətinin riyakar siyasətinin nəticəsidir. Üzdə sülh müqaviləsinin imzalanmasında maraqlı olduqlarını, Azərbaycanın ərazi bütövlüyünü tanıdıqlarını desələr də, əməldə əks mövqe tutur və hərbi-siyasi təxribatları davam etdirirlər. Halbuki üçtərəfli bəyanatın ən vacib müddəalarından biri Rusiya sülhməramlılarının bölgəyə daxil olması ilə paralel şəkildə qanunsuz silahlı birləşmələrin Azərbaycan ərazilərindən çıxarılması idi. Amma bu müddəa indiyə qədər təmin olunmur və bu, sülhməramlıların gözü qarşısında baş verir. Yəni həmin müddəa rəsmi Moskva ilə İrəvan tərəfindən kobudcasına pozulur, hər iki ölkə bu sənədin legitimsizləşdirilməsi üçün əlindən gələni edir.

Bütün bunlara görə məsuliyyət Rusiya və Ermənistanın üzərinə düşür, çünki sənəddə bu ölkələrin rəhbərlərinin imzası var. Bəzi məlumatlar onu deməyə əsas verir ki, qanunsuz hərbi birləşmələr yeni təxribatlar hazırlayır və bu, rus sülhməramlıların səssiz müşayiəti ilə baş verir. Azərbaycan isə baş verə biləcək istənilən təxribata səssiz qalmayacaq. Silahlı Qüvvələrimiz tərəfindən “Qisas-3” əməliyyatı qaçılmaz olacaq. Çünki biz öz ərazilərimizdə qanunsuz silahlı birləşmələrin mövcudluğunu qəbul etməyəcəyik.