Ermənistan öz sonunu gətirir

Ağdam-Xankəndi yolunun açılmasından sonra Azərbaycanın gömrük və sərhəd-nəzarət rejimi qaydaları tətbiq edilməklə Laçın-Xankəndi yolu açıla bilər.

Bu fikirləri Prezident İlham Əliyev Amerika Birləşmiş Ştatlarının dövlət katibi Antoni Blinkenlə telefon danışığı zamanı deyib. Dövlət başçısı bununla Azərbaycanın haqlı və beynəlxalq hüquqa əsaslanan ədalətli mövqeyini növbəti dəfə bəyan etdi. Beləliklə, rəsmi Bakı həm də Vaşinqton vasitəsilə bütün dünyaya mesaj göndərmiş oldu.

Təbii ki, Azərbaycan ərazilərində qanunsuz silahlı birləşmələrin fəaliyyətləri, təxribatlarını davam etdirmələri mümkünsüz, separatizmin bütün formaları isə qəbuledilməzdir. Çünki biz bütün addımlarımızı sülh və sabitliyin bərpa olunması üçün atırıq. Ermənistan və havadarları isə alətə çevirdikləri separatçı qurumun ömrünü uzatmağa çalışmaqla buna mane olurlar. Amma unudurlar ki, Azərbaycan bu gün dünya miqyasında özünün milli maraqlarını qətiyyətlə qoruyan və hədəflərinə doğru inamla irəliləyən ölkədir.

Heç kimə sirr deyil ki, Ermənistan Azərbaycanın sülh əlini tutsa, heç vaxt görmədiyi rifaha qovuşa bilər. Amma monoetnik və antaqonist olan bu ölkə qeyri-adekvat davranışları ilə israrla buna qarşı çıxır, əslində isə öz sonunu gətirir. Bəlkə də, dünyada öz-özünə bu qədər düşmən olan və hər keçən gün özünü daha çox ifşa edən ikinci ölkə yoxdur. Bəllidir ki, kin, nifrət və mənfur xislətləri ermənilərə öz çirkin mövqelərindən dönməyə imkan vermir.