Ermənistan regiondakı reallığı düzgün dəyərləndirməlidir

Prezident İlham Əliyevin təşəbbüsü ilə vəsiqə qazanan “3+3” əməkdaşlıq formatı məzmun və mahiyyətinə görə beynəlxalq səviyyəli platformadır. Çünki bu format son 30 ildə rahatlıq bilməyən Cənubi Qafqaza sülh və dinclik vəd etməklə bərabər, onun nəticələri bütün Avrasiya üçün xüsusi əhəmiyyət kəsb edir.

Diplomatik mənbələrdən əldə olunan məlumata görə, tezliklə İranda “3+3” formatında xarici işlər nazirləri səviyyəsində görüş keçiriləcək. Bildirilir ki, Ermənistan artıq bu görüşdə iştiraka razılıq verib. Əlbəttə ki, rəsmi İrəvanın bu qərarı təqdirəlayiq hesab edilsə də, özündə bir sıra təəssüfləndirici və təəccüblü məqamları əks edir.

Əvvəlcə onu qeyd edək ki, İranda görüşə razılıq verən Baş nazir Nikol Paşinyanın eyni vaxtda Avropa Parlamentində səsləndirdiyi ifadələr yenə də başadüşülən deyil. Beynəlxalq siyasi elitaya yaxşı məlumdur ki, “3+3” formatının mahiyyəti “region problemlərinin regionda həll olunması” deməkdir. Bu platforma mövcud vəziyyəti, yeni geosiyasi müstəvini özündə ehtiva edir. Əgər N.Paşinyan bu yanaşmanı, doğrudan da, səmimiyyətlə qəbul edirsə, niyə inadkarlıqla Strasburq, Brüssel və Parisdəki havadarlarını regional proseslərə müdaxiləyə çağırır?

“3+3” formatının təşəbbüskarı Azərbaycandır. İndiyədək bu formatda görüşün baş tutmaması İranın Azərbaycan ilə münasibətlərindəki soyuqluq və gərginliklə bağlı olub. Artıq bu soyuq dövr arxada qalıb. Tərəflər heç bir vasitəçi olmadan aralarındakı vəziyyəti müzakirələr əsasında tənzimləyib. Buna görə də indi artıq “3+3” formatında görüşün keçirilməsinə heç bir maneə yoxdur.