Ermənistanın Zəngəzur dəhlizi barədə cəhdi aranı qatdı | İranlı rəsmilər hərəkətə keçdi

İran Zəngəzur dəhlizi ilə bağlı Ermənistana sərt xəbərdarlıq edib. Bu barədə “Past” qəzeti məlumat yayıb.

Erməni nəşrinin iddiasına görə, İrəvanın Mehri üzərindən keçəcək dəhlizə nəzarəti ABŞ-yə verməyə razı olması Tehranda qəzəblə qarşılanıb:

“İranın ali dini rəhbərinin müşaviri Əli Əkbər Vilayəti avqustun 5-də Zəngəzur dəhlizi ilə bağlı xəbərdarlıq edib və İranın buna sərt cavab verəcəyini vurğulayıb. Vilayəti bildirib ki, belə bir addım İranın sərt cavabı ilə üzləşəcək.

Avqustun 4-5-də Türkmənistanın Türkmənbaşı şəhərində işgüzar səfərdə olan Prezident Vaaqn Xaçaturyan dünən “Dənizə çıxışı olmayan ölkələrin üçüncü Konfransı” çərçivəsində İranın vitse-prezidenti Məhəmmədrza Ariflə görüşüb. Sonuncu qeyd edib ki, İranın qonşuluq siyasətində Ermənistanın xüsusi yeri var və Tehran-İrəvan münasibətləri möhkəm və sarsılmaz əsaslara söykənir.

İran rəsmisi vurğulayıb ki, sülh regionun bütün ölkələrinin maraqlarına uyğundur və regional problemlərin həlli xarici dövlətlərin müdaxiləsi olmadan həyata keçirilməlidir.

Əslində, İranın vitse-prezidenti diplomatik yolla Ermənistan hakimiyyətinə açıq xəbərdarlıq edir: ABŞ-ni Cənubi Qafqaza gətirməklə İrəvam Ermənistan-İran münasibətlərini bundan irəli gələn bütün nəticələrlə təhlükə altına qoyur”.