Fransa bir daha sübut etdi ki... | Kemi Seba bu səbəbə görə həbs edildi

Neokolonializmlə fəal mübarizə aparan Kemi Seba Afrika ölkələrinin müstəqilliyi və suverenliyi uğrunda hərəkatın simvolik liderlərindən biridir. Həm də Fransa neokolonializminin əsas tənqidçilərindən sayılır.

K.Seba fikirlərini sərbəst şəkildə ifadə etdiyinə görə Fransa polisi tərəfindən həbs olunub.

Bir vaxtlar dünya demokratiyasına töhfələr verən Fransanın antidemokratik siyasətinə əslən afrikalı olan Kemi Seba da tuş gəlib.

Məlumata görə, K.Seba oktyabrın 15-də restoranda həmkarlarından biri ilə nahar edərkən saxlanılıb. O, Parisin müstəmləkəçilik siyasəti nəticəsində Afrika ölkələrinə dəymiş ziyanla bağlı ölkə hakimiyyətini açıq şəkildə tənqid etdiyinə və Fransanın dənizaşırı ərazilərinin müstəqilliyi uğrunda hərəkatları dəstəklədiyinə görə 2024-cü ildə Fransa vətəndaşlığından məhrum edilib.

Reallıq budur ki, Fransa öz gözündə tiri görməyib başqalarının gözündə çöp axtaran “qoca qitə”nin ümumiləşmiş obrazıdır.

Yəni bu ölkələr digər dövlətlərin insan hüquqlarını pozduğu, söz azadlığını heçə saymasını iddia edərək daxili işlərinə müdaxilə etməyə, hətta sanksiyalarla təhdid etməyə çalışır. Reallıqda isə vəziyyət necədir? Avropada etirazlar zorakılıqlarla basdırılır, insanların hüquqlarını məhdudlaşdıran qərarlar qəbul olunur, Kemi Seba kimi rasizmə məruz qalaraq həbsə atılır.

Nəticə etibarilə özünü dünyaya “demokratiya nümunəsi” kimi təqdim edən Fransanın öz vətəndaşlarının hüquq və azadlıqlarına münasibəti ortadadır.

Qeyd etdiyimiz kimi, bu ölkədə vətəndaşlara qarşı ən müxtəlif təzyiq üsullarına müraciət edilir, insanlar repressiyaya və zorakılığa məruz qalırlar.

Belə olan halda demokratik siyasi sistemə malik olduğunu iddia edən, dünyaya “demokratiya” dərsi keçməyə çalışan Fransa hansı haqla və ya əsasla demokratik dəyərlərdən və insan hüquqlarından bəhs edir? Əslində bunun özü də böyük güclərin ikili standartlarından xəbər verir.