Fransanın Ermənistana silah satmasına gürcü politoloqlar səssiz qalmadı

Cənubi Qafqazda daimi sülhün təmin edilməsi məsələsinin gündəmdə olduğu vaxtda tərəflərdən birinə silah göndərmək sülhə mane olmaq cəhdidir.

Fransanın Gürcüstan üzərindən Ermənistana silah göndərməsini Baku TV-yə şərh edən gürcü politoloq və ekspertlər belə düşünürlər.

Politoloq Tenqiz Txilava bildirib ki, Azərbaycan Ermənistandan həm iqtisadi, həm də hərbi sahədə qat-qat güclüdür.

“Şuşada imzalanan sənəd əsasında Azərbaycana hücum Türkiyəyə hücum deməkdir. Bunları nəzərə alaraq deyə bilərik ki, Ermənistanın müharibəyə başlaması mümkün deyil. Ona görə də Ermənistan üçün Fransanın göndərdiyi silahların heç bir əhəmiyyəti yoxdur. Fransa sadəcə bununla bölgədə Ermənistan üzərindən varlığını göstərməyə çalışır”, – deyə politoloq əlavə edib.

Ermənistan və Fransanın təxribat yönümlü addımlarına baxmayaraq, gürcü politoloqlar Azərbaycan və Ermənistan arasında sülh müqaviləsinin ən yaxın zamanda imzalanacağına əminlik ifadə edirlər.