Fransanın qərəzli mövqeyi siyasətçilərin diqqətində: merə qarşı irad

Fransanın son zamanlar Azərbaycana qarşı qərəzli mövqeyi dünya siyasətçilərinin də diqqətini çəkib.

Xüsusilə Ukrayna lideri Volodimir Zelenskinin Prezident İlham Əliyevə zəng edərək Azərbaycanın suverenliyinin bərpasına dəstəyini ifadə etməsindən qıcıqlanan Fransanın Vienn şəhərinin meriyasının bunun cavabında 2022-ci ildə qaldırdığı Ukrayna bayrağını nümayişkaranə şəkildə endirməsi ukraynalı siyasətçilərin təəssüfünə səbəb olub.

Ukrayna Ali Radasının hakim “Xalqın xidmətçisi” partiyasından deputat Yuri Kamelçuk bildirib ki, fransalı siyasətçilərin Azərbaycanın suverenliyinə qarşı bu cür münasibəti qərəzdən başqa bir şey deyil.

“Sərhədləri BMT-nin bütün üzvləri, eləcə də müxtəlif Avropa qətnamələri ilə tanınan ölkələrin ərazi bütövlüyünə qarşı qərəzli şərhləri görmək bizdə təəssüf doğurur. O cümlədən Fransa tərəfindən Azərbaycana qarşı. Mən belə hesab edirəm ki, heç kim beynəlxalq prinsiplərə zidd gedə bilməz. Amma hazırda bu, yalnız fransızların, o şəhərin merinin mövqeyidir. Ukrayna bayrağının endirilməsinə gəldikdə, bu, bütün Fransada Ukrayna bayrağının endirilməsi demək deyil.

Azərbaycan öz ərazi bütövlüyü uğrunda mübarizə aparıb və buna nail olub. Bizim azərbaycanlı dostlarımızın Qarabağla bağlı problemi var idi. Artıq o həll olunub. Hazırda Azərbaycan BMT-nin bütün ölkələri tərəfindən tanınan qanuni suveren ərazilərini işğaldan azad edib”, – deyə o əlavə edib.

Qeyd edək ki, bir sıra Ukrayna mətbuatında və sosial şəbəkələrdə də fransalı merin addımı tənqidə səbəb olub.