Hərbi ekspertdən sensasiyalı açıqlama | Rusiyasız dünyanın varlığı mümkünsüzdür...

“Rusiya Federasiyası Ukrayna və ona havadarlıq edən, özünü müttəfiq adlandıran ölkələrə dəfələrlə xəbərdarlıq edərək bildirib ki, taktiki silahlardan Federasiya ərazisinə hücum olunarsa, nüvə silahından istifadə hüquqlarımızdan yararlanacağıq”.

Bunu Baku TV-yə açıqlamasında rusiyalı hərbi ekspert Yevgeni Mixaylov deyib.

O bildirib ki, Ukraynanın Amerika istehsalı olan ATACMS raketlərindən Bryansk ərazisinə endirdiyi aviazərbələrdən sonra həmin o ölkələr Rusiyanın cavabının nə ola biləcəyini düşünməyə başlayıb:

“Mən əminəm ki, Rusiya adekvat cavab verəcək. Qərbdə əqli yerində olanlar artıq anlayırlar ki, Rusiyaya uzanan əllər cavabsız qalmayacaq. Bizim ərazilərə hücum edənlərə verəcəyimiz layiqli cavab isə istər eskalasiyanı artıra, istərsə də 3-cü Dünya müharibəsinin başlamasına səbəb ola bilər. Vladimir Putin dəfələrlə bildirib ki, Rusiyasız dünyanın varlığı mümkünsüzdür. Bu, sadəcə pafoslu ifadələr deyil. Biz öz düşmənlərimizə qarşı həmişə insani davranış nümayiş etdirmişik”.

Hərbi ekspert vurğulayıb ki, artıq nüvə doktrinası mahiyyətini dəyişib:

“İstənilən halda onlar anlamalıdırlar ki, Rusiya İraq, İran, Livan deyil. Bizim adekvat cavab verməyə gücümüz və bu addımların arxasında dayanmağa hünərimiz var. Artan eskalasiya fonunda Ukrayna və müttəfiqlərinin sonrakı aqibətinin necə olacağını təxmin etmək bir o qədər də çətin deyil”.