Hikmət Hacıyevdən Ararat Mirzoyana cavab

“Ermənistanın Xarici İşlər Nazirliyi rəhbərinin paylaşımı riyakarlıqdan başqa bir şey deyil”.

Bunu Prezidentin köməkçisi Hikmət Hacıyev “Twitter”də Ermənistanın xarici işlər naziri Ararat Mirzoyanın paylaşımına münasibət bildirərkən qeyd edib.

“Birincisi, yerli polis valideynlərinin nəzarətsizliyi səbəbi ilə iki azyaşlının səhlənkarlıq və avtomobildəki yüksək temperatur nəticəsində yuxudaykən öldüyünü təsdiqləyib. Bu, riyakarlıqdan başqa bir şey deyil. İkincisi, “Laçın” sərhəd-buraxılış məntəqəsi fəaliyyət göstərir və ümumiyyətlə bunun bu hadisə ilə heç bir əlaqəsi yoxdur. Üçünçüsü, Ermənistan xarici işlər naziri, yəqin ki, Laçın sərhəd-buraxılış məntəqəsini qeyd etməklə, guya Qarabağda ərzaq qıtlığı varmış kimi yanıltmağa çalışır. Amma Xankəndi restoranından olan videoda bunun əksi görünür”, – deyə o bildirib.

Qeyd edək ki, Ermənistanın xarici işlər naziri Ararat Mirzoyan “Twitter” hesabında guya Qarabağın 7 aydır blokadada qaldığını və bunun nəticəsində 2 azyaşlının sözdə humanitar böhran nəticəsində həyatını itirdiyini bildirmişdi.