İlham Əliyev Keniya Respublikasının Prezidenti Uilyam Samoei Ruto ilə görüşdü

Prezident İlham Əliyevin sentyabrın 23-də BMT-nin Nyu-Yorkdakı mənzil-qərargahında Keniya Prezidenti Uilyam Samoei Ruto ilə görüşü olub.

Söhbət zamanı dövlət başçıları Azərbaycanla Keniya arasında münasibətlərin inkişafından məmnunluqlarını ifadə ediblər.

Azərbaycanın Keniyada səfirliyinin açılmasının əlaqələrimizin inkişafına təkan verdiyi qeyd olunub.

Müxtəlif səviyyələrdə qarşılıqlı səfərlərin həyata keçirilməsinin vacibliyi vurğulanıb, əlaqələrimizin daha da inkişaf etdirilməsi üçün hökumət rəsmilərindən ibarət nümayəndə heyətlərinin səfərlərinin təşkili məsələsinə toxunulub. Bu xüsusda, enerji, kənd təsərrüfatı, sənaye və digər sahələrdə əməkdaşlıq üçün geniş imkanların olduğu vurğulanıb.

Keniyanın BMT-nin Məskunlaşma Proqramının (UN-Habitat) Assambleyasının ikinci sessiyasına ev sahibliyi etdiyi qeyd olunaraq, Azərbaycanla Keniya arasında bu çərçivədə əməkdaşlıq üçün geniş imkanların olduğu bildirilib.

Görüşdə ölkələrimizin beynəlxalq təşkilatlar çərçivəsində əməkdaşlıq məsələlərinə dair fikir mübadiləsi aparılıb.