İlham Əliyev: Qarabağda 1 milyondan artıq mina basdırılıb

"Müharibə bitəndən sonra minalar üç yüzdən artıq insanın həyatına son qoyub və ya onları ağır şəkildə yaralayıb. Yəni azad olunmuş ərazilərdə üç yüzə yaxın mina partlayışı baş verib".

Bu sözləri Azərbaycan Prezidenti İlham Əliyev “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında səsləndirib.

Minaların basdırılmasının müharibə cinayəti olduğunu diqqətə çatdıran dövlət başçısı deyib: “Həmin minaların xəritəsinin təqdim edilməməsi Ermənistanın bizə qarşı olan terrorunun davamıdır. Biz bilirik ki, o xəritələr onlarda var, çünki minalar məhz belə basdırılır. Minaları basdıranların əlində xəritə olur, çünki onlar özləri həmin minaya düşə bilərlər. Ermənistanın Baş naziri şəxsən rəsmi olaraq bizə deyirdi ki, onlarda belə xəritələr yoxdur. Nəhayət, boyunlarına aldılar ki, elə xəritələr var”.

“Ermənilərin bizə verdiyi xəritə təqribən 400 min minanı əhatə edir. Yəni etiraf etdilər ki, onlar 400 mindən artıq mina basdırıblar. Ancaq biz bilirik və bu, olduqca dəqiq məlumatdır ki, minaların sayı 1 milyona yaxındır”, – Prezident İlham Əliyev vurğulayıb.