İranı şübhələndirən odur ki... | Sübhani ABŞ-nin planını ifşa etdi

“ABŞ-nin regiondakı siyasəti Cənubi Qafqaz xalqlarının marağını nəzərə almır”.

Bunu İranın İrəvandakı səfiri Mehdi Sübhani Vaşinqtonun Ermənistan-Azərbaycan prosesini dəstəkləməsi ilə bağlı bəyanatını şərh edərkən deyib.

“Ermənistan və Azərbaycanın sülhə nail olmaq səylərini alqışlayırıq. Müharibənin əleyhinəyik və sülh tərəfdarıyıq. Regionda sülhə alternativ yoxdur. Bu, prinsipial yanaşmamızdır. İrəvanla Bakı arasında dialoqun tərəfdarıyıq”, – o bildirib.

M.Sübhani qeyd edib ki, Tehran Vaşinqtona etibar etmir:

“Böyük Şeytan” bölgəyə daxil olmaqla öz məqsədlərini güdür, xalqların sülh və təhlükəsizliyi üçün səy göstərmir. Məqsədlərinə çatmaq üçün ABŞ müxtəlif vasitələrdən istifadə edir. Onlar Cənubi Qafqazı başqa ölkə ilə hesablaşma platformasına çevirmək istəyirlər. “Böyük Şeytan”la bağlı təcrübəmizi nəzərə alsaq, onların iddialarına çox şübhə ilə yanaşırıq. İran ABŞ-nin region ölkələri üçün xeyir istədiyinə inanmır. Burada hər hansı bir müharibə və ya gərginlik regionun bütün ölkələrinə təsir edəcək”.

Onun sözlərinə görə, region ölkələrinin daxil olduğu 3+3 formatı uzunmüddətli sülhə nail olmağa kömək edə bilər.

Qeyd edək ki, ABŞ-nin Ermənistanda böyük səfirliyi, həmçinin biolaboratoriyaları var.