İranın Baş prokuroru Bakıya zəng etdi

Fevralın 13-də Azərbaycan Baş prokuroru Kamran Əliyevlə İranın Baş prokuroru Məhəmməd Cəfər Montazeri arasında telefon danışığı olub.

Baş Prokurorluğun məlumatına görə, telefon danışığı qarşı tərəfin təşəbbüsü ilə baş tutub. İranın Baş prokuroru Montazeri yanvarın 27-də Azərbaycanın Tehrandakı Səfirliyinin binasında törədilmiş terror hadisəsinə görə təəssüf hissi keçirdiyini bildirərək, Azərbaycan xalqına, zərərçəkmişlərin ailə üzvlərinə başsağlığını ifadə edib və azərbaycanlı həmkarını cinayət işinin istintaqının gedişatı haqqında ətraflı məlumatlandırıb.

K.Əliyev İrandakı səfirliyimizə qarşı törədilmiş terror aktını pisləyərək Azərbaycanın aidiyyəti istintaq qurumunda cinayət işinin istintaqının davam etdiyini həmkarının diqqətinə çatdırıb.

Baş prokuror İran tərəfindən cinayət işinin tam və hərtərəfli araşdırılmasının, bütün iştirakçıların müəyyən edilərək məsuliyyətə cəlb olunmasının, bu terror aktının törədilməsinə səbəb və şəratinin araşdırılmasının zəruriliyini vurğulayıb.

Sonda hər iki tərəf bu cinayət işinin nəzarətdə saxlanmasına və qarşılıqlı hüquqi yardım çərçivəsində əməkdaşlıq edilməsinə dair razılıq əldə ediblər.