İrəvan Qafan Hava Limanı ilə sülh qapısını bağlayır

Qafqaz bölgəsinə ayaq açandan bəri fitnə toxumu səpməklə zaman-zaman öz mövqelərini gücləndirməyə çalışan erməni millətçi dairələri nəyin bahasına olursa-olsun əsasız iddialarını qorumağa çalışırlar.

Keçmiş SSRİ-nin dağılmasından sonra dünyada yaranmış siyasi reallıq, deyəsən, hələ də Ermənistan rəhbərliyinin düşüncəsinə çatmır.

Təcavüzkar ritorikaya söykənərək, süni millətçilikdən ağız dolusu danışan bu ölkənin baş naziri Nikol Paşinyan indi də bildirib ki, gələn həftə İrəvandan Azərbaycanla sərhəddəki Qafan şəhərinə müntəzəm uçuşlar başlayacaq.

Hazırda regiondakı bütün beynəlxalq iqtisadi əlaqələrdən məhrum olan, öz əhalisinin elementar ehtiyaclarını təmin etmək üçün xarici ölkələr və beynəlxalq təşkilatlar qarşısında əl açıb dilənən Ermənistanın belə bir vəziyyətdə Qafandakı hava limanı üçün vəsait sərf etməsi çoxlu suallar yaradır. Çünki Qafan Hava Limanına enib-qalxan təyyarələrin Azərbaycanın hava məkanını pozacağı qaçılmazdır. Belə olan halda guya mülki ad altında istifadəyə veriləcəyi deyilən bu hava limanından Ermənistanın hərbi məqsədlər üçün yararlanmağa çalışacağını da düşünmək olar.