İrəvandan müharibə siqnalı | Ermənilər yenidən bu yola əl atdılar

Təəssüflər olsun ki, bütün xəbərdarlıqlara rəğmən, Ermənistan silahlandırma prosesini dayandırmır.

İndi də bu ölkə Hindistan və Fransanın birgə istehsal etdiyi 155 millimetr çaplı “Trajan” haubitsalarını almaq üçün razılaşma əldə edib.

Silahın yaxın zamanlarda Ermənistana ixrac ediləcəyi gözlənilir. Ermənistanın riyakar sülh bəyanatları fonunda belə addımlar atması yeni müharibəyə hazırlıq kimi də qiymətləndirilə bilər.

Qeyd edək ki, Ermənistan Ordusu Fransa istehsalı olan 500-ə yaxın birdəfəlik “Apilas” reaktiv yaylım atəşi sistemləri və ABŞ-nin tank əleyhinə idarə olunan raket kompleksləri ilə də təmin edilib. Bu siyahılar və rəqəmlər hər ötən müddətdə artır.

Həmçinin İkinci Qarabağ müharibəsindən sonra Hindistan Ermənistana “Pinaka” və “Akaş” raketlərini də ixrac edir.

Ermənistanı Azərbaycana qarşı yeni təxribatlara təhrik edənlər həm də erməni cəmiyyətində mövcud olan revanşizm dalğasının səngiməməsi üçün bütün səylərini ortaya qoyurlar. Həmin cəmiyyətin nümayəndələri sosial şəbəkələrdə də ölkəmizə qarşı nifrət dolu ifadələr sərgiləyirlər.

Azərbaycan Prezidenti baş verənlərin fonunda yenə də müdriklik nümayiş etdirir və Ermənistana dostyana çağırış edir. Lakin ehtiyatı da əldən vermirik.