İstanbulda keçiriləcək iclasda hansı məsələlərin vacibliyi vurğulanacaq | Detallar açıqlandı

Türkiyənin xarici işlər naziri Hakan Fidan İstanbulda keçirilməsi nəzərdə tutulan “3+3” regional platformasının iclasında Bakı ilə İrəvan arasında sülh müqaviləsinin bağlanması prosesinə Ankaranın dəstəyini vurğulayacaq.

Bu barədə “RİA Novosti” Ankaradakı diplomatik mənbəyə istinadən məlumat yayıb.

“Onun çıxışında Ankaranın səylərinin Qafqazda sülh və sabitliyin bərqərar olmasına yönəldiyini deyəcəyi gözlənilir. Nazir Türkiyə ilə Ermənistan arasında münasibətlərin normallaşması prosesinin də Ankara tərəfindən dəstəkləndiyini vurğulayacaq”, – mənbədə bildirilib.

Diplomatik mənbə qeyd edib ki, görüş iştirakçıları münaqişələrin sülh yolu ilə həllinin vacibliyini vurğulayan birgə bəyanat qəbul edəcək:

“İclasın sonunda iştirakçı ölkələr birgə bəyanat qəbul etməyi planlaşdırır. Bəyanatın mətnində region ölkələri arasında problemlərin BMT Nizamnaməsində təsbit olunmuş prinsiplər əsasında dialoq yolu ilə həllinin zəruriliyi vurğulanacaq. Bəyanatın mətnində həmçinin regional iqtisadi əməkdaşlığın, etimadın yaradılmasının və rifahın artırılmasının vacibliyini qeyd etmək planlaşdırılır”.