Kadırov döyüşçülərini Rostova göndərdi

Çeçenistan rəhbəri Ramzan Kadırov “Vaqner” Xüsusi Hərbi Şirkətinin başçısı Yevgeni Priqojinin qiyamının qarşısını almaq üçün Rostova çeçen döyüşçülərinin göndərildiyini açıqlayıb.

O bu barədə “Telegram” kanalında məlumat verib. Bildirib ki, Y.Priqojin və “Vaqner” döyüşçülərinin qiyam cəhdi arxadan vurulan zərbədir.

“Müdafiə Nazirliyi və Rusiya Qvardiyasının Çeçenistan Respublikasındakı döyüşçüləri artıq gərginlik zonalarına yola düşüblər”, – deyən R.Kadırov qiyamın yatırılmalı olduğunu vurğulayıb. O, bunun üçün sərt tədbirlər görməyə hazır olduğunu bildirib.

“Vladimir Vladimiroviç xalqa müraciətində tamamilə haqlı olaraq qeyd etdi: bu, hərbi qiyamdır! Bu cür hərəkətlərə heç bir bəraət qazandırmaq olmaz!”, – deyə R.Kadırov Prezidentə tam dəstəyini ifadə edib.

O həmçinin döyüşçüləri təxribatlara qapılmamağa çağırıb və hamının belə bir çətin gündə Rusiya Prezidentinin ətrafında birləşməsinin vacibliyini vurğulayıb.