Moskvada Bayramovla Lavrov və Mirzoyan görüşünün detalları açıqlandı

“Azərbaycan və Ermənistan xarici işlər nazirləri – Ceyhun Bayramov və Ararat Mirzoyan arasında Moskvada keçirilən son görüşdə tərəflərə güzəştə getməyi təklif etdik”.

Bunu Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçar deyib. Hazırkı mərhələdə tərəflərin bu təklifləri nəzərdən keçirdiklərini söyləyən Qonçar fikir ayrılıqlarının aradan qaldırılacağına ümid etdiyini bildirib.

O, Rusiyanın regionda davamlı sülh və sabitliyin təmin olunmasında maraqlı olduğunu vurğulayıb.

“Rəsmi Moskva bütün istiqamətlər üzrə Qarabağ məsələsinin həllində fəal iştirak edir. Rusiya Cənubi Qafqazda problemlərin həllindən kənarda qala bilməz. Rusiya bütün istiqamətlər, o cümlədən regionda iqtisadi və nəqliyyat kommunikasiyalarının açılması, Bakı ilə İrəvan arasında sülh müqaviləsinin razılaşdırılması, iki ölkə arasında dialoqun inkişaf etdirilməsi məsələlərində vasitəçilik səylərini davam etdirir” deyən XİN nümayəndəsi bildirib ki, proses istənilən sürətlə davam etmir.

Cənubi Qafqazda nəqliyyat kommunikasiyalarının açılması Rusiya, Azərbaycan və Ermənistan baş nazirlərinin müavinlərinin həmsədrlik etdiyi üçtərəfli işçi qrupu vasitəsilə ətraflı müzakirə olunur.

Qeyd edək ki, Rusiya, Azərbaycan və Ermənistan XİN başçıları iyulun 25-də Moskvada bir araya gəliblər.